ស្តាប់ការបកស្រាយរបស់នគរបាលខេត្តកណ្តាលដែលថាចង់វាយខ្នោះអ្នកសារព័ត៌មានក្នុងការឡាយផ្ទាល់ព័ត៌មាន

 

ក្រុមការងារព័ត៌មាន និងប្រតិកម្មរហ័ស នៃអធិការដ្ឋាននគរបាលស្រុកពញាឮ សូមធ្វេីការឆ្លើយតបទៅនឹងគេហទំព័រសារព័ត៌មាន C007 FB Online ដែលបានឡាយបន្តផ្ទាល់ មានខ្លឹមសារថា៖​"ប៉ូលិស​ស្រុកពញាឮ​ ហាមឃាត់មិនឱ្យអ្នកសារព័ត៌មានឡាយបន្តផ្ទាល់ពីករណីគ្រោះថ្នាក់ចរាចរណ៍នៅភូមិព្រែកក្ដី​ ឃុំព្រែកតាទែន​ ស្រុកពញាឮ​ និងគំរាមវាយខ្នោះអ្នកសារព័ត៌មាន"។ 

​បន្ទាប់ពីទទួលបានព័ត៌មានខាងលេី លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាឱ្យលោកវរសេនីយ៍ឯក ដួង តេង អធិការនគរបាលស្រុកពញាឮ ស្រាវជ្រាវបំភ្លឺករណីខាងលើ។

ជាលទ្ធផល៖

នៅថ្ងៃទី២៤ ខែតុលា ឆ្នាំ២០២១ លោកអធិការបានបញ្ជាឱ្យកម្លាំងផ្នែកសណ្តាប់ធ្នាប់ នៃអធិការដ្ឋាននគរបាលស្រុកពញាឮ ស្រាវជ្រាវបំភ្លឺ ដូចខាងក្រោម៖

​កាលពីថ្ងៃសៅរ៍​ ទី២៣ ខែតុលា ឆ្នាំ២០២១ វេលាម៉ោង១៥និង២០នាទី​ មានករណីគ្រោះថ្នាក់ចរាចរណ៍ផ្លូវគោក បង្កឡើងដោយម៉ូតូបុកជាមួយសួនពុះចែកទ្រូងផ្លូវ​ (បង្កដោយខ្លួនឯង) កេីតឡេីងនៅចំណុចផ្លូវជាតិលេខ៥ ចន្លោះគីឡូម៉ែត្រលេខ២២-២៣ ស្ថិតក្នុងភូមិព្រែកក្តី ឃុំព្រែកតាទែន ស្រុកពញាឮ ខេត្តកណ្ដាល​ ពិតប្រាកដមែន។​ ក្នុងករណីនេះបណ្តាលអោយស្លាប់អ្នកបេីកបរ ០១នាក់ប្រុស​ នៅហ្នឹងកន្លែងកើតហេតុ​ និងរបួសស្រាល ចំនួន០១នាក់ប្រុស អ្នករួមដំណើរ។

​ក្នុុងពេលនោះកម្លាំងផ្នែកជំនាញ និងប៉ុស្តិ៍នគរបាលរដ្ឋបាលព្រែកតាទែន កំពុងធ្វើការវាស់វែង ស្រាវជ្រាវ និងពិនិត្យកន្លែងកើតហេតុទៅតាមនីតិវិធី ក៏មានក្រុមអ្នកសារព័ត៌មាន​ C007 FB Online បានចុះមកធ្វេីការផ្សាយផ្ទាល់​ ពីករណីគ្រោះថ្នាក់ចរាចរណ៍ខាងលេី​ ប៉ុន្តែត្រូវបានសមត្ថកិច្ចផ្នែកជំនាញ ហាមឃាត់មិនអនុញ្ញាតអោយធ្វេីការផ្សាយ ពីព្រោះសមត្ថកិច្ចកំពុងស៊ើបសួរ ស្រាវជ្រាវ រកមូលហេតុនៃគ្រោះថ្នាក់ចរាចរណ៍ខាងលើ សួររកឈ្មោះ អាសយដ្ឋានរបស់អ្នកបើកបរ និងអ្នករួមដំណើរ អោយបានច្បាស់លាស់ ដើម្បីធ្វើរបាយការណ៍អោយបានត្រឹមត្រូវ។​ ម្យ៉ាងទៀតចំពោះបងប្អូនជនរងគ្រោះ(សព)​ក៏បានសំណូមពរដល់អ្នកសារព័ត៌មានកុំអោយថតផ្សាយដែរ។​ លេីសពីនេះចំពោះការផ្សាយរបស់អ្នកសារព័ត៌មាន​ គឺគាត់មិនបានទំនាក់ទំនងជាមួយសមត្ថកិច្ចជាមុន និងមិនបានសួរនាំអំពីអង្គហេតុនៃគ្រោះថ្នាក់ចរាចរណ៍ខាងលើឱ្យបានច្បាស់មុននឹងផ្សាយឡេីយទេីបបណ្ដាលឱ្យមានការ​តវ៉ាពាក្យសម្ដីទៅវិញទៅមក​ រវាងកម្លាំងនគរបាល​ និងអ្នកសារព័ត៌មាន។  

ខណៈនោះកម្លាំងសមត្ថកិច្ចក៏បានដេីរចេញពីអ្នកសារព័ត៌មានហេីយនិយាយថា​ "និយាយមិនចេះស្ដាប់គ្នាចឹងតេី​ស បានចេះតែគេចាប់ដាក់ខ្នោះ"​ មិនបានប្រើសម្តីគំរាមថាវាយខ្នោះអ្នកសារព័ត៌មាននោះទេ។ ​ដោយសារសមត្ថកិច្ចបាននិយាយប្រាប់គាត់ថា "បងមុនធ្វើការថតឡាយ បងត្រូវមកសុំការអនុញ្ញាតពីសមត្ថកិច្ច និងសុំរបាយការណ៍ ដើម្បីយកទៅផ្សាយអោយបានត្រឹមត្រូវ"​ ព្រោះពេលពួកគាត់មកដល់ គឺគាត់យកទូរស័ព្ទមកផ្សាយផ្ទាល់តែម្ដង ហេីយសមត្ថកិច្ចបាននិយាយជាមួយគាត់ថា "បងកុំឡាយអី​ ពីព្រោះសាច់ញាតិសពបានរកឃើញហើយ មុននឹងឡាយបងត្រូវសុំការអនុញ្ញាតពីសមត្ថកិច្ចសិន" ប៉ុន្តែគាត់គិតតែស្រែកថា"គាត់មានសិទ្ធផ្សាយ២៥ខេត្ត​/ក្រុង (គាត់ប្រកែកជាមួយសមត្ថកិច្ច​ ដោយមិនស្ដាប់ហេតុផលរបស់សមត្ថកិច្ចឡើយ)"។ 

ក្រោយពីទទួលបានបទបញ្ជាពីលោកអធិការ​ ថាអនុញ្ញាតឱ្យសារព័ត៌មានផ្សាយ​ ពេលនោះសមត្ថកិច្ចនៅកន្លែងកេីតហេតុក៏បានអនុញ្ញាតឱ្យផ្សាយ​ ប៉ុន្តែពួកគាត់មិនបានផ្សាយអំពីករណីគ្រោះថ្នាក់ចរាចរណ៍ខាងលេីទេ គាត់បែរជានិយាយតែពីសមត្ថកិច្ចមិនព្រមអោយគាត់ផ្សាយទៅវិញ។

អាស្រ័យហេតុនេះ សូមសាធារណជន និងបណ្តាញសារព័ត៌មានជ្រាប និងកុំមានការភាន់ច្រឡំ៕