បញ្ជូន​នារី និង​ប្រុស​សា​ហាយទៅ​តុលាការ​ ករណីរួមគ្នាស្ទាក់​សម្លាប់​ប្តី​ខ្លួនឯង



ខេត្តកំពង់ស្ពឺ៖ កម្លាំងនគរបាលខេត្តកំពង់ស្ពឺ បានបញ្ជូន​នារីម្នាក់ និង​ប្រុស​សាហាយ ដែលបានរួមគ្នាស្ទាក់សម្លាប់ប្តីខ្លួនឯង ទៅតុលាការកាលពី​រសៀល ថ្ងៃទី​៣១ ខែសីហាឆ្នាំ​២០២០។


មន្ត្រីនគរបាល​ព្រហ្មទណ្ឌ​កំរិតធ្ងន់ខេត្តកំពង់ស្ពឺ បាន​ឱ្យ​ដឹងថា ស្ត្រី​ដែល​នាំ​ប្រុស​សា​ហាយមក​ចាំ​កាប់​ប្តី​ខ្លួនឯង​នោះមានឈ្មោះ ឃឺ​ន ស្រី​រដ្ឋ អាយុ១៩​ឆ្នាំ រស់នៅក្នុង​ភូមិ​អង្គ​តា​ឯក ឃុំ​ភ្នំ​តូច ស្រុក​ឧដុង្គ ខេត្តកំពង់ស្ពឺ ។ 


ប្រភពបានបន្តថា ស្ត្រី​ផិតក្បត់​ប្តី​នោះ បាន​ប្រើល្បិចឱ្យ​ប្តី​របស់ខ្លួន​ឈ្មោះ ជឿន ធារ៉ា អាយុ១៧​ឆ្នាំ រស់នៅ​ភូមិ​អង្គ​តា​ឯក ឃុំ​ភ្នំ​តូច ស្រុក​ឧដុង្គ ថា​ឱ្យជូនទៅ​ហូប​មី​ហឹរ នៅ​ផ្សារ​ថ្នល់ទទឹង លុះដល់​ម៉ោង០៨យប់ ទើប​ត្រឡប់​ទៅវិញ​ ខណៈនោះ ឈ្មោះ ស្រី​រដ្ឋ បាន​ទូរស័ព្ទ​ហៅឱ្យឈ្មោះ ធី​ម ធា ហៅ ហ័ង អាយុ​២០​ឆ្នាំ មក​ស្ទាក់​សម្លាប់​ប្តី​ខ្លួនឯងនៅពេល​ពួកគេជិះ​តាមផ្លូវ​លេខ៥១ ដល់​ចំណុច​ខាងត្បូងវត្ត​អង្គ​តា​ឡិ​ក ស្ថិតក្នុង​ភូមិ​អង្គ​តា​ឡឹ​ក ឃុំ​សំបូរ ស្រុក​សំរោង​ទង ដោយ​ជនសង្ស័យ ឈ្មោះ ធា ជិះ​ម៉ូតូម៉ាក​ហុងដា វេ​វ ពណ៌​ខៀវ គ្មាន​ស្លាក​លេខ ។​


​ប្រភព​ដដែលបាន​បន្តថា ខណៈ​ប្តី​ប្រពន្ធ​នោះធ្វើ​ដំណើរ​មកដល់​ចំណុចកើតហេតុ ជនសង្ស័យបាន​ឃាត់ ម៉ូតូ​ជនរងគ្រោះ រួច​ឈ្មោះ ស្រី រដ្ឋ ចុះ​ពីលើ​ម៉ូតូ ហើយក៏​បាន​យក​ដាវ កាប់​លើ​ឈ្មោះ ជឿន ធារ៉ា តែ​កាប់​មិនត្រូវ ជនរងគ្រោះ។ ចំណែក​ជនសង្ស័យបាន​ដឹក​ឈ្មោះ ស្រី​រដ្ឋ មកលេង​សួនច្បារ ខេត្តកំពង់ស្ពឺ​។


បច្ចុប្បន្ន ជនសង្ស័យ​ទាំងពីរ​នាក់ បាន​ត្រូវ​ឃុំខ្លួន នៅ​ស្នងការដ្ឋាន​នគរបាល​ខេត្តកំពង់ស្ពឺ រង់ចាំ​តុលាការចាត់ការ​តាម​នីតិវិធី ៕

Post a Comment

0 Comments