ក្រុមការងារព័ត៌មាន​ និងប្រតិកម្មរហ័ស​ នៃស្នងការដ្ឋាននគរបាលខេត្ត​កំពង់ចាម ឆ្លើយតបរឿងទីតាំងលួចលេងល្បែងសុីសងប្រជល់មាន់​

ខេត្តកំពង់ចាម៖ ក្រុមការងារព័ត៌មាន​ និងប្រតិកម្មរហ័ស​ នៃស្នងការដ្ឋាននគរបាលខេត្ត​កំពង់ចាម​ សូមជម្រាបជូនសាធារណជនអ្នកសារព័ត៌មាន និងបណ្តាញទំនាក់ទំនងសង្គមជ្រាប​ថា​ កាលនៅថ្ងៃទី១៤​ ខែញ្ញា​ឆ្នាំ​២០២១ វេលាម៉ោង១៥ និង២០នាទី បន្ទាប់ពីទទួលបាន​ព័ត៌មាន​ពីប្រជាពលរដ្ឋ​ និងសារព័ត៌មានបានរាយការណ៍ថា មានក្រុមលួចលេងសុីសងប្រជល់មាន់ភ្នាល់ដាក់ប្រាក់​ស្ថិតនៅចំណុចក្នុងភូមិកងតាណឹងទី៧ ឃុំកងតាណឹង​ ស្រុកកងមាស ខេត្តកំពង់ចាម​ ។

លោកឧត្តមសេនីយ៍ទោ​ ​ឯម​ កុសល​ ស្នងការនគរបាលខេត្ត​កំពង់ចាម​ និងលោក ភោគ សាវុធ អភិបាល នៃគណ:អភិបាលស្រុកកងមាស បានចាត់បញ្ជាឲ្យកម្លាំងជំនាញរបស់អធិការដ្ឋាននគរបាលស្រុកកងមាស កម្លាំង​ប៉ុស្តិ៍នគរបាលរដ្ឋបាលកងតាណឹងសហការ​ជាមួយអាជា្ញ​ធរមូលដ្ឋាន​ ដឹកនាំដោយលោកវរសេនីយ៍ទោ​ ថុង ភូរីវុធ​ អធិការរង​ បានចុះដល់ទីតាំងខាងលេី​ ដេីម្បី​ធ្វេីការស្រាវជ្រាវ​ និងបង្រ្កាបករណី លួចលេងល្បែងសុីសងប្រជល់មាន់​ នៅចំណុចចំការត្នោត (ខាងជើងជាប់បឹងកក់) ដែលមានចម្ងាយប្រហែល៤០០០ម៉ែត្រពី​ភូមិ​ ស្ថិតក្នុងភូមិកងតាណឹងទី៧ ឃុំកងតាណឹង​ ស្រុកកងមាស ខេត្តកំពង់ចាម​ ។  

ដោយភូមិសាស្ត្រស្មុគ្រស្មាញ ផ្លូវពិបាកធ្វើដំណើរ ពេលកម្លាំងយើងចុះទៅដល់ មុខសញ្ញាក្រុមអ្នកញៀនល្បែង បាននាំគ្នារត់គេចខ្លួនចូលក្នុងចំការស្វាយអស់​ ដោយបន្សល់ទុកនូវ ស៊ុំក្រុងមាន់ចំនួន០២ ស៊ុំ​តែប៉ុណ្ណោះ​។ 

តាមការបញ្ជាក់ពីអាជ្ញាធរមូលដ្ឋាន​ ​និងប្រជាពលរដ្ឋ ជាម្ចាស់ចំការក្បែរនោះ បានបញ្ជាក់ឲ្យដឹងថា៖ កន្លងមកនៅចំណុចខាងលេីនេះមានគេមកលួចលេងល្បែងជល់មាន់លួចលាក់ ម្តងម្កាល ពីមួយគូ ឬ ពីរគូ ក៏ឈប់លេងទៅវិញ ចំពោះសមាសភាពដែលមកលេងភាគច្រើនជាអ្នកមកពីចម្ងាយ ហើយក៏ឃើញមានសមត្ថកិច្ចចុះមកបង្ក្រាបជាច្រើនលើកផងដែរ​។ 

ប៉ុន្តែទោះជាយ៉ាងណាក៏ដោយ លោកឧត្តមសេនីយ៍ស្នងការ បានបញ្ជាឲ្យលោកអធិការនគរបាលស្រុកកងមាស ចាត់តាំងលោកអធិការរង ០១រូប ទទួលដឹកនាំ ពង្រឹងប៉ុស្តិ៍នគរបាលរដ្ឋបាល​ដាក់កម្លាំងឃ្លាំមើល ត្រួតពិនិត្យទីតាំងខាងលើនេះ ជាប់ជាប្រចាំ ដើម្បីបង្ការ ទប់ស្កាត់ និងបង្ក្រាបសកម្មភាពលួចលេងល្បែងស៊ីសងខុសច្បាប់បន្តទៀត។ 

ស្នងការដ្ឋាននគរបាលខេត្តកំពង់ចាម ស្នើសុំភ្នាក់ងារសារព័ត៌មាន សូមមេត្តាសហការផ្តល់ព័ត៌មាន ឬចង្អុលបង្ហាញមុខសញ្ញាសង្ស័យដើម្បីសមត្ថកិច្ចមានមូលដ្ឋានច្បាស់លាស់ក្នុងការអនុវត្តគោលការណ៍ជំនាញ និងនីតិវិធី។

ស្នងការដ្ឋាននគរបាលខេត្តកំពង់ចាម​ សូមថ្លែងអំណរគុណចំពោះសាធារណជន អ្នកសារព័ត៌មាន និងបណ្ដាញទំនាក់ទំនងសង្គមដែលតែងសហការផ្ដល់ព័ត៌មានពាក់ព័ន្ធនឹងសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ក្នុងភូមិសាស្រ្តទឹកដីខេត្តកំពង់ចាម យើងខ្ញុំនឹងខិតខំពង្រឹងសមត្ថភាពជំនាញក្នុងការរក្សាសន្តិសុខ សុវត្ថិភាព ពិសេសការសម្ងាត់ជូនគ្រប់ប្រភពដែលបានផ្ដល់ព័ត៌មាន និងសូមអំពាវនាវឲ្យគ្រប់ប្រភពផ្ដល់ព័ត៌មានទាំងអស់ មេត្តាជួយសហការរក្សាការសម្ងាត់ផ្ទាល់ខ្លួន ដើម្បីឱ្យសមត្ថកិច្ចអនុវត្តវិធានការជំនាញប្រកបដោយប្រសិទ្ធភាពខ្ពស់ ៕