Muyreal-News | កម្លាំងសង្កាត់រដ្ឋបាលព្រៃឈើត្បែងមានជ័យបង្ក្រាបឈើប្រណីតប្រភេទធ្នង់ជាង២០ដុំវែងខ្លី


ខេត្តព្រះវិហារ៖ ឈើប្រណីតប្រភេទធ្នង់ជាង២០ដុំវែងនិងខ្លី ដែលឈ្មួញបានដឹកជញ្ជូនតាមគោយន្តកន្ត្រៃ ចេញពីព្រៃមកទម្លាក់ទុកក្នុងបរិវេណផ្ទះប្រជាពលរដ្ឋ ដើម្បីត្រៀមលក់បន្តឱ្យឈ្មួញ និង ដឹកយកទៅលក់ឱ្យក្រុមអ្នកបើកសិប្បកម្មកែច្នៃឈើនៅក្នុងក្រុងព្រះវិហារ ត្រូវបានកម្លាំងសង្កាត់រដ្ឋបាលព្រៃឈើត្បែងមានជ័យចុះបង្ក្រាបនិងរឹបអូស 


ប្រតិបត្តិការចុះបង្ក្រាបនិងរឹបអូសឈើនេះ បានធ្វើឡើងនៅថ្ងៃទី១២ ខែកក្កដា ឆ្នាំ២០២២ ស្ថិតក្នុងភូមិសេដ្ឋកិច្ច ឃុំឈានមុខ ស្រុកត្បែងមានជ័យ ខេត្តព្រះវិហារ 


ប្រតិបត្តិការនេះដឹកនាំកម្លាំងដោយនាយសង្កាត់រដ្ឋបាលព្រៃឈើត្បែងមានជ័យ លោក សុង បញ្ញា ក្រោមបញ្ជាពីលោក វង្ស វិសិដ្ឋនាយផ្នែករដ្ឋបាលព្រៃឈើត្បែងមានជ័យ និងក្រោមការអនុញ្ញាតពីនាយខណ្ឌរដ្ឋបាលព្រៃឈើព្រះវិហារលោក នួន សុខុម បន្ទាប់ពីបានការឯកភាពពីលោកតំណាងអយ្យការសាលាដំបូងខេត្តព្រះវិហារ 


សមត្ថកិច្ចបង្រ្កាបឈើបានឱ្យដឹងថា ក្រុមឈ្មួញតែងតែធ្វើសកម្មភាពដឹកជញ្ជូនឈើពីដែនព្រៃយកមកទម្លាក់ទុកនៅក្នុងបរិវេណផ្ទះខាងលើនោះស្ទើរជារៀងរាល់ថ្ងៃ ដើម្បីលក់បន្តទៅឱ្យម្ចាស់រថយន្តកាមរីហើម១គ្រឿង ពណ៌ស្លែចាស់ ពាក់ស្លាកលេខ ភ្នំពេញ 2E-7849 ហើយម្ចាស់រថយន្តនេះបានដឹកឈើទាំងនោះយកទៅចែកចាយតាមរោងសិប្បកម្មធំៗ នៅក្នុងខេត្តព្រះវិហារ 


ប្រជាពលដ្ឋបានប្រាប់ថា សកម្មភាពនេះបានកើតឡើងជាយូរមកហើយ ប៉ុន្តែគេមិនដែលឃើញមានការបង្ក្រាបពីកម្លាំងសមត្ថកិច្ចមូលដ្ឋាននោះទេ ទើបតែពេលនេះត្រូវបានធ្វើឡើងជាលើកដំបូងនៅទីនេះ 


មន្ត្រីរដ្ឋបាលព្រៃឈើបានរឹបអូសយកឈើធ្នង់បានជាង២០ដុំ(វែងនិងខ្លីនាំយកមករក្សាទុកនៅផ្នែករដ្ឋបាលព្រៃឈើត្បែងមានជ័យដើម្បីកសាងសំណុំរឿងចាត់ការតាមនៅនីតិវិធី៕

Post a Comment

0 Comments