ក្មេងប្រុស​វ័យ​ ១៦ ​ឆ្នាំ​ម្នាក់​ត្រូវ​រន្ទះបាញ់​ស្លាប់​ ក្នុងពេល​កំពុង​ជិះ​ម៉ូតូ​កាត់​ភ្លៀង



ខេត្តបាត់ដំបង៖ ​ក្មេងប្រុសឈ្មោះ រស់ ភារ អាយុ​ ១៦ ​ឆ្នាំម្នាក់ ត្រូវរន្ទះបាញ់ស្លាប់ កាលពីថ្ងៃទី២១​ ខែមីនា ឆ្នាំ២០២២ ពេលកំពុងជិះម៉ូតូកាត់ភ្លៀង​ ត្រឡប់ពីភ្ជួរស្រែមកផ្ទះវិញនៅភូមិតាក្រី ឃុំតាក្រី ស្រុកកំរៀង 


លោក វេ គឹមចត់ អធិការនគរបាលស្រុកកំរៀងបានឱ្យដឹងនៅថ្ងៃទី២២ ​មីនាថា «​ករណីនេះក្រោយហេតុការណ៍ភ្លាមៗ​ សមត្ថកិច្ចយើងបានចុះទៅដល់កន្លែងកើតហេតុ។ គាត់ពិតជាស្លាប់ដោយសាររន្ទះបាញ់មែន​»​ លោកបានរំឭកតាមសម្តីសាក្សីថា កាលពីវេលាម៉ោង​ ព្រឹក ថ្ងៃទី២១ ​ខែមីនា ឆ្នាំ២០២២ យុវជនម្នាក់ឈ្មោះ​ ថុន ចាន់ណេត ភេទប្រុស អាយុប២១ឆ្នាំបានទៅភ្ជួរស្រែពេលនោះ គ្រឿងចក្ររបស់គេអស់ប្រេងម៉ាស៊ូតហើយបានទូរស័ព្ទហៅក្មេងរងគ្រោះ​ ឱ្យដឹកប្រេងម៉ាស៊ូតយកទៅឱ្យ 


បន្ទាប់មកដល់ម៉ោងជាង​ ​ រសៀលថ្ងៃដដែលក្មេងរងគ្រោះបានជិះម៉ូតូត្រឡប់មកផ្ទះវិញ តាមផ្លូវលំ ក្នុងភូមិដំណាក់សាលា ឃុំតាក្រីស្រុកកំរៀង ខណៈមេឃកំពុងធ្លាក់ភ្លៀងខ្លាំង រីឯឈ្មោះ​ ថុន ចាន់ណេត ​បានជិះម៉ូតូតាមក្រោយ 


ពេលនោះ ឈ្មោះ ថុន ចាន់ណេត ​កំពុងជិះម៉ូតូស្រាប់តែឮសូរសំឡេងរន្ទះបាញ់ ហើយរូបគេបានបន្តដំណើរមកតាមពីក្រោយក្មេងរងគ្រោះ ក៏បានឃើញក្មេងរងគ្រោះដេកផ្កាប់មុខលើដី គ្រានោះ ចាន់ណេត បានចុះទៅលើកក្មេងរងគ្រោះក៏ដឹងថា ដាច់ខ្យល់ស្លាប់បាត់ទៅហើយ ហើយក៏ផ្តល់ព័ត៌មានមកម្តាយឪពុកក្មេង​ និងជូនដំណឹងដល់នគរបាល-​ប៉ុស្តិ៍ឃុំតាក្រី


លោកបន្តទៀតថា ក្រោយពីនគរបាលប៉ុស្តិ៍ទទួលបានព័ត៌មានមក ក៏រាយការណ៍បន្តមកលោក ហើយលោកបានចាត់កម្លាំងចុះទៅដល់ទីតាំងកើតហេតុភ្លាមៗនោះដែរ តាមការពិនិត្យកោសល្យវិច័យរបស់នគរបាលបច្ចេកទេសវិទ្យាសាស្ត្រ និងគ្រូពេទ្យបានបង្ហាញថា នៅត្រង់ត្រចៀកផ្នែកខាងស្តាំរបស់ក្មេងរងគ្រោះ មានហូរឈាមចេញពីរន្ធត្រចៀក ហើយនៅលើក្បាលផ្នែកខាងស្តាំមានឆេះសក់រួញចូលគ្នាដែលជាលទ្ធផលគឺក្មេងរងគ្រោះត្រូវរន្ទះបាញ់ស្លាប់ពិតប្រាកដមែន


ក្រោយពីសមត្ថកិច្ចពិនិត្យនិងធ្វើកំណត់ហេតុរួចរាល់ បានប្រគល់សាកសពជនរងគ្រោះដល់ក្រុមគ្រួសារយកធ្វើបុណ្យតាមប្រពៃណី៕

Post a Comment

0 Comments