ពលរដ្ឋចាំមើលលោកអធិការខណ្ឌមានជ័យហ៊ានបង្ក្រាប់ល្បែងស៊ីសងខុសច្បាប់របស់ឈ្មោះ ឆើត ដែរឬទេ?

រាជធានីភ្នំពេញ៖ ទីតាំងល្បែងសុីសងជល់មាន់និងអាប៉ោងខុសច្បាប់ មួយកន្លែងចាប់ផ្ដើមបើកដំណើរការលេងទៀតហើយនៅក្នុងបរិវេណផ្ទះជួល ជាប់មាត់ប្រឡាយទឹកស្អុយ ជិតដល់ស្ពានអាកាសស្ទឹងមានជ័យ តាមបណ្ដោយផ្លូវបេតុង នៅក្នុងទឹកដីសង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ អាជ្ញាធរសមត្ថកិច្ចមូលដ្ឋាន នាំគ្នារក្សាភាពស្ងៀមស្ងាត់ឬមួយមិនហ៊ានបង្ក្រាប ។

យោងតាមប្រភពបានឲ្យដឹងថា ទីតាំងល្បែងស៊ីសងខុសច្បាប់នៅខាងលើនេះបានផ្អាកមួយរយៈ ទើបតែនៅរសៀលថ្ងៃទី១១ ខែកុម្ភ: ឆ្នាំ២០២២នេះ គេឃើញចាប់ផ្ដើមបើកដំណើរការលេងយ៉ាងពពាក់ពពូន បង្កឲ្យភ្ញាក់ផ្អើលដល់ពលរដ្ឋរស់នៅជិតខាង ធ្វើឲ្យពួកគាត់រស់នៅព្រួយបារម្ភភ័យខ្លាចអំពីបញ្ហាអសន្តិសុខដូចជា អំពើចោរកម្មនិងបទល្មើសផ្សេងៗ(ពោលគឺ)លួច ឆក់ ប្លន់ និងអំពើហិង្សាជាដើម ។

ប្រភពបានបន្តទៀតថា រាជរដ្ឋាភិបាល មានវិធានការទប់ស្កាត់ការឆ្លងរីករាលដាល ជំងឺកូវីដ-19 ទើបបម្លែងថ្មីប្រភេទ( អូមីក្រុង ) ឲ្យមានប្រសិទ្ធភាព ផ្ទុយទៅវិញអាជ្ញាធរក្នុងមូលដ្ឋាន ខណ្ឌមានជ័យ បែរជាបណ្ដោយឲ្យកើតមានល្បែងជល់មាន់និងអាប៉ោងខុសច្បាប់បើកលេងមួយកន្លែងនៅខាងលើនេះ យ៉ាងគឃ្លើននិងអនាធិបតេយ្យ ។ 

ករណីនេះពលរដ្ឋដាក់ការសង្ស័យ ម្ចាស់ទីតាំងល្បែងសុីសងបានឃុបឃិតត្រូវរ៉ូវគ្នាជាប្រព័នជាមួយ អាជ្ញាធរមន្ត្រីពាក់ព័ន្ធក្នុងខណ្ឌមានជ័យ រាជធានីភ្នំពេញ រួចអស់ហើយ ទើបទីតាំងល្បែងមួយនេះ បើកលេងបានដោយរលូន តើហេតុអ្វី?  លោកវរសេនីយ៍ទោ អ៊ុក បូនីន អធិការនគរបាល ខណ្ឌមានជ័យ មិនបង្រ្កាប!ទីតាំងល្បែងមួយនេះ។

អាស្រ័យហេតុនេះពលរដ្ឋនាំគ្នាអំពាវនាវទៅដល់ ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ ជាពិសេសលោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ សូមជួយពិនិត្យនិងមានវិធានការទប់ស្កាត់ឬមួយចាត់កម្លាំងធ្វើការបង្រ្កាប!ទីតាំងល្បែងសុីសងខុសច្បាប់ កំពុងបើកលេងមួយកន្លែង ស្ថិតនៅភូមិខាងលើនេះ ដោយអនុគ្រោះផងទាន ៕