សម្ដេចនាយករដ្ឋមន្ត្រី ហ៊ុន សែន បានប្រសិទ្ធនាមស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ប្រវែង១.១៣១ម៉ែត្រ ទទឹង១៣,៥ម៉ែត្រ ថាជាស្ពានភ្ជាប់និស្ស័យ៖ ថ្លែងនៅក្នុងពិធីសម្ពោធដាក់ឱ្យប្រើប្រាស់ ជាផ្លូវការស្ពាននេះ និងពិធីបើកការដ្ឋានសាងសង់ផ្លូវជាតិលេខ៧១C



ថ្ងៃអង្គារ ៤រោច ខែកត្តិក ឆ្នាំឆ្លូវ ត្រីស័ក ..២៥៦៥ ត្រូវនឹងថ្ងៃទី២៣ ខែវិច្ឆិកា ឆ្នាំ២០២១ កំពង់ចាម៖ ឯកឧត្ដម ស៊ុន ចាន់ថុល ទេសរដ្ឋមន្រ្តី រដ្ឋមន្ដ្រីក្រសួងសាធារណការ និងដឹកជញ្ជូន បានអញ្ជើញអម ដំណើរសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងពិធី សម្ពោធដាក់ឱ្យប្រើប្រាស់ជាផ្លូវការ ស្ពានមិត្តភាពកម្ពុជា-ចិនស្ទឹងត្រង់-ក្រូចឆ្មារ និងពិធីបើកការដ្ឋានសាង សង់ផ្លូវជាតិលេខ៧១ដោយមានការអញ្ជើញចូលរួមពីឯកឧត្តម វ៉ាង វិនធៀន ឯកអគ្គរដ្ឋទូតនៃ សាធារណរដ្ឋប្រជាមានិតចិន ប្រចាំព្រះរាជាចក្រកម្ពុជា សមាជិក សមាជិកានៃព្រឹទ្ធសភា រដ្ឋសភា និង រាជរដ្ឋាភិបាល ភ្ញៀវកិត្តិយសជាតិ-អន្តរជាតិអាជ្ញាធរខេត្តកំពង់ចាម និងខេត្តត្បូងឃ្មុំ បងប្អូនប្រជាពលរដ្ឋ លោកគ្រូ អ្នកគ្រូ សិស្សានុសិស្សផងដែរ។


សូមជម្រាបជូនថា៖ គម្រោងសាងសង់ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ៖ ចាប់ផ្តើមនៅត្រង់ គីឡូម៉ែត្រលេខ៥៨+២០០ត្រើយខាងលិចស្ថិតលើផ្លូវខេត្តលេខ ២៧១៤ នៅចំណុចភូមិបឹងដែង ឃុំព្រែក កក់ ស្រុកស្ទឹងត្រង់ ខេត្តកំពង់ចាម ភ្ជាប់ទៅត្រើយខាងកើតទន្លេមេគង្គនៅចំណុច ភូមិក្តុលកណ្តាល ឃុំ ទ្រា ស្រុកក្រូចឆ្មារ ខេត្តត្បូងឃ្មុំ។ ស្ពាននេះមានប្រវែង១.១៣១ ម៉ែត្រទទឹង១៣, ម៉ែត្រ ក្រាលបេតុងកៅស៊ូ កម្រាស់ ៥សង់ទីម៉ែត្រ មានផ្លូវរថយន្តចំនួន២គន្លង ផ្លូវម៉ូតូចំនួន២គន្លង ផ្លូវថ្មើរជើងចំនួន២គន្លង សម្រាប់ទៅមក។ ផ្លូវមេសងខាងស្ពាន តភ្ជាប់ទៅផ្លូវជាតិលេខ៧១មានប្រវែង .៣២៣ ម៉ែត្រ។ សរុប រួមទាំងស្ពាននិងផ្លូវតភ្ជាប់មានប្រវែងសរុប៩.៤៥៤ម៉ែត្រ។


ស្ពាននេះត្រូវបានបើកការដ្ឋានកាលពីថ្ងៃទី០៩ ខែកុម្ភៈ ឆ្នាំ២០១៨  ក្រោមអធិបតីភាពដ៏ខ្ពង់ខ្ពស់បំផុតរបស់សម្តេចតេជោនាយករដ្ឋមន្រ្តីដោយត្រូវប្រើប្រាស់រយៈពេលសាងសង់ចំនួន៤២ខែ សាងសង់ដោយ ក្រុមហ៊ុនសំណង់សៀងហៃ(SCG) និងត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេសក្វាង ចូវ វ៉ានអាន ចំណាយថវិកាអស់ប្រមាណ៥៦,៩៩៨លានដុល្លារអាមេរិក។


ដោយឡែក គម្រោងសាងសង់ផ្លូវជាតិលេខ៧១មានប្រវែងសរុប១១៤,៦២គីឡូម៉ែត្រ ចាប់ផ្តើម    ពីគីឡូម៉ែត្រលេខ១៥៤+៧០០ផ្លូវជាតិលេខ៧ ស្ថិតក្នុងឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ និងបញ្ចប់ នៅគីឡូម៉ែត្រលេខ៣០+៤០០ផ្លូវជាតិលេខ៧១ ស្ថិតក្នុងឃុំស្វាយទាប ស្រុកចំការលើ ខេត្តកំពង់ចាម។ គម្រោងសាងសង់ផ្លូវនេះរួមមាន៖ ផ្លូវមេប្រវែង៩២,៤៤៦ . ទទឹងផ្លូវ១១ម៉ែត្រ ក្រាលកៅស៊ូបេតុង(AC) កម្រាស់៧សង់ទីម៉ែត្រ មានកន្លែងសម្រាប់បត់ត្រឡប់២កន្លែង(U-Turn) ផ្លូវតភ្ជាប់មានប្រវែង១៥,៨២១  . ទទឹងផ្លូវ១១ម៉ែត្រ ក្រាលកៅស៊ូបេតុង(AC) កម្រាស់៧សង់ទីម៉ែត្រ ផ្លូវខ្នែងចំនួន៩ខ្សែ ប្រវែង៦,៣៥៣ .ទទឹងតួផ្លូវ ៩ម៉ែត្រ ក្រាលកៅស៊ូពីរស្រទាប់ស្តើង(DBST) ស្ពានចំនួន១១កន្លែង ប្រវែង៨៧៥មែត្រ និងដាក់លូគ្រប់ប្រភេទចំនួន២០២កន្លែង ដែលនឹងប្រើប្រាស់រយៈពេលសាងសង់ចំនួន៤២ខែ សាងសង់ ដោយក្រុមហ៊ុនសំណង់សៀងហៃ(SCG) និងត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេស ក្វាងចូវវ៉ាន អាន គ្រោងចំណាយថវិកាសាងសង់ប្រមាណ១២៩,៩៨លានដុល្លារអាមេរិក។


គួរកត់សម្គាល់ថា៖ ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ និងផ្លូវជាតិលេខ៧១គឺជាគម្រោងយុទ្ធសាស្រ្តប្រទាក់ក្រឡាគ្នាយ៉ាងសំខាន់ សម្រាប់តភ្ជាប់ទំនាក់ទំនងសកម្មភាពពាណិជ្ជកម្ម និងការធ្វើដំណើររបស់បងប្អូនប្រជាពលរដ្ឋដែលរស់នៅខេត្តកំពង់ចាម ខេត្តត្បូងឃ្មុំ និងខេត្តជាប់ព្រំប្រទល់គ្នាផ្សេងៗ ទៀត ព្រមទាំងសម្រួលដល់ការដឹកជញ្ជូនពូជដំណាំ ផលិតផលកសិកម្ម និងកសិ-ឧស្សាហកម្ម ឱ្យកាន់តែរហ័ស កាត់បន្ថយការចំណាយ និងចំណេញពេលវេលា។ 


នេះជាសមិទ្ធផលថ្មីមួយ និងជាចំណងដៃដ៏ថ្លៃថ្លាមិនអាចកាត់ថ្លៃបានរបស់រាជរដ្ឋាភិបាលកម្ពុជាជូនដល់បងប្អូនប្រជាពលរដ្ឋខេត្តកំពង់ចាម និងខេត្តត្បូងឃ្មុំ ព្រមទាំងបងប្អូនប្រជាពលរដ្ឋទូទាំងប្រទេស ដើម្បីប្រើប្រាស់ជាប្រយោជន៍ទូទៅ និងយូរអង្វែង ក្រោមការដឹកនាំប្រកបដោយភាពប៉ិនប្រសប់ និងគតិបណ្ឌិតរបស់សម្ដេចនាយករដ្ឋមន្រ្តី ដែលជាអគ្គមគ្គុទេសន៍ និងជាប្រតិបត្តិករនយោបាយឈ្នះ-ឈ្នះ ដែលបាននាំយកសន្តិភាពមកជូនជាតិមាតុភូមិកម្ពុជា។


ថ្លែងក្នុងរបាយការណ៍គោរពជូនសម្តេចនាយករដ្ឋមន្ត្រី និងអង្គពិធីទាំងមូល ឯកឧត្តមទេសរដ្ឋមន្ត្រី បាន ថ្លែងអំណរគុណយ៉ាងជ្រាលជ្រាលជូនចំពោះប្រជាពលរដ្ឋ និងរដ្ឋាភិបាលនៃសាធារណរដ្ឋប្រជាមានិតចិន ដែលបានផ្ដល់ហិរញ្ញប្បទានសម្បទានជំនួយឥតសំណង និងជំនួយបច្ចេកទេសជាបន្ដបន្ទាប់ ដើម្បីចូល រួមចំណែកក្នុងការស្ដារ និងអភិវឌ្ឍហេដ្ឋារចនាសម្ព័ន្ធដឹកជញ្ជូននៅកម្ពុជា សំដៅជំរុញកំណើនសេដ្ឋកិច្ច ជាតិ និងកាត់បន្ថយភាពក្រីក្រឱ្យកាន់តែថយចុះបន្ថែមទៀត។


ឯកឧត្តមទេសរដ្ឋមន្ត្រី បានថ្លែងអំណរគុណផងដែរជូនចំពោះក្រសួង-ស្ថាប័ន ពាក់ព័ន្ធ ជាពិសេស ក្រសួង សេដ្ឋកិច្ច និងហិរញ្ញវត្ថុអាជ្ញាធរដែនដីខេត្តកំពង់ចាម និងខេត្តត្បូងឃ្មុំ ក្រុមហ៊ុនសាងសង់ និងក្រុមហ៊ុន ទីប្រឹក្សាបច្ចេកទេស និងបងប្អូនប្រជាពលរដ្ឋដែលមានដីធ្លី ភូមិឋាន និងផ្ទះសម្បែងស្ថិតនៅជិតការដ្ឋានសាងសង់ស្ពានមិត្តភាពកម្ពុជា-ចិនស្ទឹងត្រង់-ក្រូចឆ្មារ ដែលបានផ្តល់  កិច្ចសហការយ៉ាងល្អប្រសើរ ជំរុញ ឱ្យការងារសាងសង់អាចដំណើរការទៅបានដោយរលូន និងទទួល បានជោគជ័យ។


ឆ្លៀតក្នុងឱកាសនេះ ឯកឧត្តមទេសរដ្ឋមន្ត្រី បានជម្រាបជូនថា៖ កម្ពុជាបានក្លាយជាប្រទេសដែលមានអត្រានៃការចាក់វ៉ាក់សាំងបង្ការខ្ពស់ទាំងនៅក្នុងតំបន់អាស៊ី និងនៅទូទាំងសកលលោក និងជាប្រទេសនាំមុនគេនៅក្នុងតំបន់អាស៊ីអាគ្នេយ៍ ដែលបានប្រកាសបើកឱ្យដំណើរការប្រទេសពេញលេញឡើងវិញលើគ្រប់វិស័យ និងការរស់នៅជាមួយកូវីដ-១៩ តាមគន្លងប្រក្រតីភាពថ្មីចាប់ពីថ្ងៃទី០១ខែវិច្ឆិកា ឆ្នាំ ២០២១នេះ និងបានអនុវត្តវិធានការលើកលែងការធ្វើចត្តាឡីស័កចំពោះជនបរទេសសម្រាប់ការធ្វើដំណើរចូលកម្ពុជានិងជនជាតិខ្មែរ ដែលបានចាក់វ៉ាក់សាំងពេញលេញចាប់ពីថ្ងៃទី១៥ ខែវិច្ឆិកា ឆ្នាំ២០២១។


បន្ថែមពីលើនេះ កម្ពុជាក៏បានដាក់ចេញនូវយុទ្ធសាស្រ្ត និងវិធានការជាបន្តបន្ទាប់ ដើម្បីត្រៀមស្តារសេដ្ឋ កិច្ចក្រោយវិបត្តិជំងឺកូវីដ-១៩លើគ្រប់វិស័យផងដែរក្នុងនោះ រាជរដ្ឋាភិបាលក៏បានគិតគូរអំពីការបន្តអនុវត្ត គម្រោងសាងសង់ហេដ្ឋារចនាសម្ព័ន្ធអាទិភាពសំខាន់ៗមួយចំនួនរួមមាន៖ គម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ នៅក្រុងសៀមរាប ខេត្តសៀមរាប ផ្លូវល្បឿនលឿនភ្នំពេញ-ព្រះសីហនុ ហេដ្ឋារចនា សម្ព័ន្ធផ្លូវ៣៤ខ្សែ នៅខេត្តព្រះសីហនុ ផ្លូវក្រវាត់ក្រុងទី៣ ផ្លូវជាតិលេខ២ និង២២ ផ្លូវជាតិលេខ៥ ផ្លូវជាតិលេខ១០ ផ្លូវជាតិលេខ៤៨ ផ្លូវលេខ១៤៦ផ្លូវជាតិលេខ៧១ ដែលកំពុងប្រារព្ធពិធីបើកការដ្ឋានសាង សង់នាពេលនេះ រួមទាំងគម្រោងសាងសង់ហេដ្ឋារចនាសម្ព័ន្ធផ្លូវ និងស្ពានសំខាន់ៗមួយចំនួនផ្សេងទៀតផងដែរ។


ឯកឧត្តមទេសរដ្ឋមន្ត្រី បានបន្តថា៖ រហូតមកដល់ពេលនេះ កម្ពុជាបានសាងសង់ផ្លូវជាតិ ផ្លូវខេត្ត និងផ្លូវជនបទ ក្រាលកៅស៊ូ និងបេតុងសរុបប្រវែងប្រមាណ១៥.០០០គីឡូម៉ែត្រ ស្ពានធំៗចំនួន២០ លើកកម្រិតព្រលានយន្តហោះឱ្យមានលក្ខណៈស្តង់ដារអន្តរជាតិចំនួន៣ និងកំពុងសាងសង់ព្រលានយន្តហោះស្តង់ដាអន្តរជាតិ៣បន្ថែមទៀត នៅខេត្តសៀមរាប ខេត្តកោះកុង និងរាជធានីភ្នំពេញលើកកម្រិតកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុឱ្យមានលក្ខណៈស្តង់ដាអន្តរជាតិ បានស្តារផ្លូវដែក ភាគខាងជើង និងភាគខាងត្បូងឡើងវិញ និងកំពុងសាងសង់ផ្លូវល្បឿនលឿនតភ្ជាប់ពីរាជធានីភ្នំពេញទៅកាន់កំពង់ផែទឹកជ្រៅក្រុងព្រះសីហនុ ព្រមទាំងសមិទ្ធផលផ្សេងៗជាច្រើនទៀតពាសពេញផ្ទៃប្រទេស ក្រោមម្លប់សន្តិភាព។


ឯកឧត្តមទេសរដ្ឋមន្ត្រី បានសំណូមពរឱ្យបងប្អូនប្រជាពលរដ្ឋ អ្នកប្រើប្រាស់ផ្លូវថ្នល់ គោរពច្បាប់ចរាចរណ៍ ទាំងអស់គ្នា ពាក់មួកសុវត្ថិភាពពេលជិះម៉ូតូ ពាក់ខ្សែក្រវាត់ឱ្យបានត្រឹមត្រូវពេលជិះរថយន្ដ និងគប្បីប្រុង ប្រយ័ត្នជាប់ជានិច្ចក្នុងពេលបើកបរ កុំបើកបរហួសល្បឿនកំណត់ កុំបើកបរពេលស្រវឹង ឬងងុយដេក ជាពិសេស កុំដឹកជញ្ជូនលើសទម្ងន់កម្រិតកំណត់បង្កឱ្យមានគ្រោះថ្នាក់ចរាចរណ៍ផងនិងធ្វើឱ្យផ្លូវឆាប់ខូចផង និងបានសំណូមពរផងដែរឱ្យបងប្អូនប្រជាពលរដ្ឋទាំងអស់បន្តចូលរួមអនុវត្តវិធានការ៣កុំនិង៣ការពារ ក្នុងបរិបទនៃការរស់នៅក្នុងគន្លងប្រក្រតីភាពថ្មីជាមួយកូវីដ-១៩ តាមអនុសាសន៍ណែនាំដ៏ខ្ពង់ខ្ពស់បំផុតរបស់សម្តេចតេជោនាយករដ្ឋមន្រ្តី និងវិធានការផ្សេងៗដទៃទៀត របស់ក្រសួងសុខាភិបាល។


ជាមួយគ្នានោះផងដែរ សម្តេចនាយករដ្ឋមន្ត្រី បានគូសបញ្ជាក់ពីសារសំខាន់ស្ពានមិត្តភាព កម្ពុជា-ចិន ស្ទឹងត្រង់-ក្រូចឆ្មារ និងផ្លូវជាតិលេខ៧១Cដែលកំពុងបើកការដ្ឋានសាងសង់នៅពេលនេះ ក្នុងការសម្រួល ការធ្វើដំណើរ និងដឹកជញ្ជូនផលិតផល កសិផល និងតភ្ជាប់ទំនាក់ទំនងរវាងបងប្អូនប្រជាពលរដ្ឋ ដែល រស់នៅក្នុងស្រុកចំការលើ ស្រុកស្ទឹងត្រង់ ស្រុកក្រូចឆ្មារ និងស្រុកត្បូងឃ្មុំ ទៅកាន់តំបន់ផ្សេងៗទៀត ក្នុងខេត្តកំពង់ចាម និងខេត្តត្បូងឃ្មុំ ក៏ដូចជានៅទូទាំងប្រទេស និងជាសមិទ្ធផលជាប្រវត្តិសាស្រ្តក្នុង សម័យកាលនៃការដឹកនាំគ្រប់គ្រងប្រទេសដោយគណបក្សប្រជាជនកម្ពុជា ដែលរក្សាបាននូវសុខ សន្តិភាព ការបង្រួបបង្រួមជាតិ ស្ថិរភាពនយោបាយ និងការអភិវឌ្ឍប្រទេសជាតិ។


សម្តេចនាយករដ្ឋមន្ត្រី ក៏បានសម្តែងនូវការកោតសរសើរផងដែរចំពោះក្រសួងសាធារណការ និងដឹក ជញ្ជូន ក្រសួងសេដ្ឋកិច្ច និងហិរញ្ញវត្ថុ អាជ្ញាធរខេត្តកំពង់ចាម និងខេត្តត្បូងឃ្មុំ និងភាគីពាក់ព័ន្ធទាំងអស់ ដែលបានខិតខំរួមជាមួយក្រុមហ៊ុនសាងសង់ និងក្រុមហ៊ុនទីប្រឹក្សាបច្ចេកទេសរបស់សាធារណរដ្ឋ ប្រជាមានិតចិនធ្វើឱ្យសម្រេចនូវសមិទ្ធផលស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារនេះឡើង។ 


សូមជម្រាបជូនថា៖ ថ្លែងនៅក្នុងពិធីសម្ពោធដាក់ឱ្យប្រើប្រាស់ជាផ្លូវការស្ពានមិត្តភាពកម្ពុជា-ចិនស្ទឹងត្រង់-ក្រូចឆ្មារ និងពិធីបើកការដ្ឋានសាងសង់ផ្លូវជាតិលេខ៧១បានសម្តេចនាយករដ្ឋមន្ត្រី បានប្រសិទ្ធនាម ស្ពាននេះថាជាស្ពានភ្ជាប់និស្ស័យ៕

Post a Comment

0 Comments